HomeRadio Vatikani
Radio Vatikani   
Në gjuhë të tjera  

     Home > Kisha >  2013-07-09 13:10:34
A+ A- Printo artikullin



Sapë: shugurimi meshtarak i dom Artur Kolës



Të shtunën e kaluar, më 6 korrik, në Katedralen e së Lumes Nënë Terezë në Vau-Dejës, u kremtua shugurimi meshtarak i dom Artur Kolës, prift i dioqezës së Sapës.
Kështu, pas dioqezave të Tiranës e Lezhë edhe Dioqeza e Sapës me gëzim e falënderim ndaj Zotit, me datën 6 korrik përjetoi momente të gëzueshme në këtë ditë hiri të veçantë që Zoti i dhuroi me shugurimin meshtarak të diakonit Dom Artur Kola përmes lutjes së Shugurimit dhe vendosjes së duarve të Shkëlqesisë së Tij Imzot Lucjan Avgustini. E pas një përgatitjeje të gjatë, ky i ri, duke marrë Urdhërin e Shenjtë të Meshtarisë, është i thirrur tashmë të predikojë Ungjillin, t’u prijë veprimeve të kultit e të zhvillojë një rol drejtues në popullin e Hyjit, duke bashkëpunuar në mënyrë të ngushtë, me Eprorët dhe me Ipeshkëvin, që është shenjë e gjallë e Krishtit, në mesin e popullit të Hyjit.
Kremtimi u mbajt në Katedralen e së Lumes Nënë Terezë në Vau-Dejës me një pjesëmarrje të madhe të popullit të Zotit, meshtarë nga dioqezat e nga Shqipërisë, motra të kongregatave të ndryshme, familjarët, miqtë dhe dashamirët e Meshtarit të Ri.
Në fillim të kësaj liturgjie të Shenjtë, ka përshëndetur Vikari Gjeneral i Sapës, Dom Simon Kulli i cili falënderoi Zotin për dhuratën që i bëri kësaj dioqeze, ka falënderuar të gjithë të pranishmit që kishin ardhur për të lutur Zotin në Shugurimin e Dom Arturit, si dhe të gjithë ata që ndikuan dhe formuan në përgatitjen e tij për meshtar. Pas riteve fetare të Ungjillit të ditës, fjalën e rastit e mbajti vetë Bariu i kësaj grigje, Imzot Lucjan Avgustini duke thënë se: “mbarë Dioqeza e Sapës gëzon së bashku me psalmistin dhe lutet në gëzimin që ka “Sot është dita që na e dhuroi Zoti”. Dhe të gjithë së bashku shprehim falënderimin ndaj të madhit Zot për dhuratat e meshtarisë që po ia dhuron popullit tonë në këtë vit të Fesë. Në vazhdim, ipeshkvi u ndal në porosinë për meshtarin e ri. Dom Artur, bir fort i dashur që po e merr urdhrin e meshtarisë: ki parasysh se duke e ushtruar shërbesën e doktrinës së shenjtë je pjesëmarrës në misionin e Krishtit, të vetmit mësues. Përhape tek të gjithë Fjalën e Zotit, të cilën vetë e ke pranuar me gëzim. Komunikoja miqësinë me Krishtin të tjerëve sipas shembullit të martirëve të popullit shqiptar. Detyrën tënde meshtarake ushtroje me përvujtëri dhe përshpirtëri, duke i bashkuar besimtarët në një familje të vetme, për t’i drejtuar kah Hyji Atë nëpërmjet Jezu Krishtit në Shpirtin Shenjt
Menjëherë pas homelisë vazhdoi riti i shugurimit të meshtarit të ri. I thirrur nga rektori i seminarit “Zoja e Këshillit të Mirë”, Atë Ignazio Buffa, Dom Arturi u përgjigj: “Ja ku jam!”, i cili tregoi se është i gatshëm dhe i denjë për të marrë Urdhrin e Shenjtë, Meshtarinë.
Më pas Imzot Lucjani vazhdoi me ritet e tjera të Shugurimit si marrjen e veshjes meshtarake, lyerjen krizmale dhe dorëzimin e bukës dhe të verës. Ndërsa në liturgjinë eukaristike që vazhdoi si zakonisht, i urdhëruari ushtroi për herë të parë ministerin e tij duke bashkëcelebruar me ipeshkvin dhe me gjymtyrë të tjera të meshtarisë.
Me Urdhrin e Shenjtë, Dom Arturi që sot filloi jetën e re meshtarake, ku Jezusi bëhet një në të e me të, duke i kërkuar gjithë vetveten. Që sot, në dhuratën totale të jetës së tij bërë në Krishtin, Shpirti i Shenjtë e veshë me shenjtëri në mënyrë që të zhvillojë ministerin e tij në besnikëri dhe në dinjitetin e meshtarisë së tij për të mirën e shenjtërimin e mbarë popullit të Hyjit.
Ndërsa me datën 7 korrik, Meshtari i ri Dom Artur Kola kremtoi meshën e parë në vendlindjen e tij, në famullinë e Shën Panteleonit në Mabë, i cili është ndjerë njëkohësisht mes emocioneve dhe gëzimit duke bashkëcelebruar me vëllezërit meshtarë. Dhe nëpërmjet lutjeve drejtuar Zotit, kërkojmë që jeta e Dom Arturit të jetë e karakterizuar nga besnikëria dhe dashuria e Jezusit, që të jetë gjithnjë e më tepër shenjë e mëshirës së Tij.




Share






Kush jemi Orari i programeve Shkruaji redaksisë Prodhime RV Links Në gjuhë të tjera Selia e Shenjtë Qyteti i Vatikanit Kremtimet liturgjike të Papës
Përmbajtja e kësaj faqeje gëzon të drejtën e autorit ©. Administratori / Web-team / Kushtet ligjore / Reklama