HomeRadio Vatikani
Radio Vatikani   
Në gjuhë të tjera  

     Home > Kisha >  2013-10-02 16:03:05
A+ A- Printo artikullin



Reforma e Kuries, Sinodi e kolegjialiteti, në qendër të punimeve të Këshillit të Kardinajve. Konferencë shtypi e atë Federiko Lombardit



Përfundon nesër në Vatikan, mbledhja e Këshillit të Kardinajve, grupit të tetë prelatëve, që kanë për detyrë ta ndihmojnë Papën Françesku në qeverisjen e Kishës e në rishikimin e Kushtetutës Apostolike “Pastor Bonus” për Kurien Romake. Punimet filluan dje paradite në Bibliotekën private të apartamentit papnor në Pallatin Apostolik për të vazhduar sot në Shtëpinë e Shën Martës. Ati i Shenjtë ishte gjithnjë i pranishëm, me përjashtim të kohës së audiencës së përgjithshme.
Për këto punime, sot, drejtori i Sallës së Shtypit të Selisë së Shenjtë, atë Federiko Lombardi mbajti një konferencë me gazetarët. Theksoi se punimet e grupit të kardinajve filluan me reflektime nga Koncili II i Vatikanit e nga këndvështrimi i përgjithshëm teologjik e shpirtëror për Kishën Katolike, pasi riorganizimi i Kuries Romake bën pjesë në këtë këndvështrim e nuk është thjesht punë administrative:
“Anëtarët e Këshillit ishin përgatitur, pati edhe reflektime me karakter teologjik, shpirtëror, nga ana e tyre, për të kujtuar e për të shikuar drejt perspektivës së Kishës, frymëzuar nga Koncili, për të përtërirë misionin e saj, marrëdhëniet ndërmjet Kishës universale dhe Kishave lokale; pati reflektime mbi temën e bashkimit, të pjesëmarrjes, të kolegjialitetit në drejtimin e Kishës, mbi temën e Kishës së të varfërve, mbi rolin e laikëve në Kishë, mbi karakterin e shërbimit të të gjitha institucioneve kishtare e mbi përgjegjësinë e të gjithë anëtarëve të Kishës për të mirën e përbashkët”.
Dje pasdite, në Shtëpinë e Shën Martës, vazhdoi sqarimet atë Lombardi, u fol për Sinodin e ardhshëm të ipeshkvijve. Papa Françesku e ka lajmëruar temën e Sinodit, temë antropologjike, kushtuar njeriut e familjes në dritën e Ungjillit. Ishte i pranishëm në mbledhje edhe Sekretari i ri i përgjithshëm i Sinodit, imzot Lorenco Baldiseri:
“Iu dha një farë përparësie kësaj teme, qysh në mbledhjen e pasdites së djeshme, si për rëndësinë e pjesëmarrjes së ipeshkvinjve, përmes Sinodit, në jetën e Kishës universale, ashtu edhe për urgjencën në saktësimin e fillimin e përgatitjes për Sinodin e ardhshëm”.
Argumenti tjetër i rëndësishëm në mbledhjen e kardinajve ka të bëjë me baritorinë familjare e martesore, për të cilën Papa ka kërkuar shpesh studime e thellime. Sipas zëdhënësit të Vatikanit, kjo temë do të jetë në plan të parë të veprimtarisë së Kishës në muajt e ardhshëm. Pas një ose dy javësh, Sekretaria e Sinodit do të japë informacione më të sakta për këtë. Përsa i përket reformës së Kuries Romake, atë Lombardi nënvizoi disa aspekte:
“Marrëdhëniet e dikastereve me Atin e Shenjtë, koordinimi ndërmjet dikastereve dhe funksioni i Sekretarisë së Shtetit e kështu me radhë… Janë tema shumë të gjera, të ndërlikuara, për të cilat ka një sasi të madhe sugjerimesh. Tani po punojnë mbi këtë tematikë”.




Share






Kush jemi Orari i programeve Shkruaji redaksisë Prodhime RV Links Në gjuhë të tjera Selia e Shenjtë Qyteti i Vatikanit Kremtimet liturgjike të Papës
Përmbajtja e kësaj faqeje gëzon të drejtën e autorit ©. Administratori / Web-team / Kushtet ligjore / Reklama