Перад паўднём, у нядзелю 26 сакавіка, Сьвяцейшы Айцец наведаў рымскую парафію Бога
Айца Міласэрнага. У сваім казаньні, ў часе Сьвятое Імшы, Папа заахвоціў вернікаў
да зразуменьня і прыняцьця Божае Міласэрнасьці. Уважнае абмеркаваньне гісторыі дазваляе
заўважыць, што Бог ( нават сярод спробаў і няшчасьцяў) праяўляе чалавеку сваю міласэрнасьць.
Знакам гэтае Божае любові зьяўляецца крыж. Хрыстос забіты і ўваскрослы ды і сёньня
астаецца знакам для людзей, якія шукаюць Бога, Царквы і Божае міласэрнасьці. Далей
Сьвяцейшы Айцец прыпомніў фрагмэнт лісту, які Папа Ян Павал ІІ меў сказаць год таму
назад, 3-га красавіка, аднак не змог, таму што дзень раней Бог паклікаў яго да сябе: Ян
Павал ІІ напісаў так: “Чалавецтву, якое часам здаецца быць загубленым і здамінаваным
сілаю зла, эгаізму і страху, Уваскросшы Госпад ахвяроўвае дар сваей любові, якая прабачае,
аднак і адкрывае душы на надзею. Гэтая міласэрнасьць навяртае і нясе мір”. У гэтым
апошнім рукапісе, які ёсьць быццам-бы тэстамантам памёршы Папа дадаў таксама: “Як
вельмі сьвет патрабуе зразуменьня і прыняцьця Божае Міласэрнасьці”.