Në lutjen e Engjëllit të Tënzot, Papa i ftoi besimtarët t’i jetojnë Krezhmët duke
shikuar Krishtin e vdekur në Kryq për ne, që na ndjek kudo me vështrimin e tij mëshirëplotë.
(26.02.2007 RV)Ky është programi që Benedikti XVI u propozoi besimtarëve në
të Dielën e parë të Krezhmëve. Të shumtë shtegtarët në Sheshin e Shën Pjetrit, ndonëse
dita ishte e ngrysur, plot me re. Papa i ftoi besimtarët ta jetojnë Kohën e Krezhmëve
me frymë të re shpirtërore, duke iu përgjigjur me bujari e gëzim thirrjes së Zotit,
që vdiq në Kryq për ne. E kjo mund të bëhet realitet në se na zgjohet në shpirt dëshira
e lutjes, e pendesës, e kthimit në rrugën e Zotit, që të ndihmojnë t’i mundësh joshjet
e Tunduesit e të gjesh në jetën e përditshme, rrugën e re të lirisë, larg skllavërisë
së mëkatit e të vdekjes. Por për ta ndjekur këtë rrugë çlirimi – pohoi Papa duke kujtuar
Mesazhin e tij të Krezhmëve, duhet rijetuar përvoja e Shën Gjonit, nxënësit të dashur
i cili, së bashku me Zojën e Bekuar, Nënën e Krishtit dhe gratë e tjera, pa me sy
të vet mbi Kalvar sesi shporohej me heshtë kraharori i Jezusit, prej nga doli gjak
e ujë: “Ky gjest që kreu një ushtar i panjohur romak, i paracaktuar të
shuhej në harresë, mbeti i ngulitur në sytë e në zemrën e Apostullit aq, sa ai e ripropozoi
në Ungjillin e tij. Sa kthime në rrugën e Zotit u vërtetuan gjatë shekujve pikërisht
falë mesazhit të dashurisë që i flet atij, i cili ia ngul sytë Krishtit të kryqëzuar!”
– tha Papa dhe në vijim kujtoi Enciklikën e tij “Deus caritas est”, në të cilën
nënvizon se e vërteta themelore ‘Zoti është dashuri’, mund të njihet e të kundrohet
vetëm duke ia ngulur sytë Jezusit të vdekur në Kryq për ne. “I nisur nga ky
kundrim, i krishteri gjen rrugën e jetës e të dashurisë së tij. Duke kundruar të Kryqëzuarinme sytë e fesë, mund të kuptojmë thellësisht ç’është mëkati, sa tragjike është
pesha e tij e, njëkohësisht, sa e pamasë është fuqia e faljes dhe e mëshirës së Zotit”. Gjatë
këtyre ditëve të Krezhmëve - shtoi Papa - duhet ta kemi gjithnjë në zemër këtë mister
me humanitet të thellë e përshpirtëri të lartë. “Duke shikuar Krishtin, e ndjejmë
se edhe ai na shikon ne. Ai, që ne vetë e shporuam me fajet tona, vijon të ndikojë
mbi botë, pa u lodhur kurrë, një përrua dashurie përdëllyese. Uroj – tha Ati i
Shenjtë - që njerëzimi ta kuptojë se vetëm në këtë burim mund të thithet energjia
e domosdoshme shpirtërore për të ndërtuar paqen e lumturinë që njeriu s’pushon kurrë
s’e kërkuari”. Në përfundim Benedikti XVI ia besoi rrugën krezhmore Virgjërës
Mari, që u shporua në shpirt te këmbët e Kryqit të të Birit. Asaj ia besoi edhe javën
e ushtrimeve shpirtërore, që filloi dje në Vatikan në praninë e Papës dhe të bashkëpunëtorëve
të tij të Kuries Romake:“Të dashur vëllezër e motra, ju ftoj të na shoqëroni me
lutjen tuaj, në sa edhe unë do të lutem për ju në heshtjen e kundrimit, duke kërkuar
ndikimin e pushtetit hyjnor mbi ju, mbi familjet tuaja e mbi bashkësitë tuaja”.