Benedikti XVI i porositi ipeshvijtë e Ukrainës, në vizitë ‘ad Limina’, të kenë marrëdhënie
të harmonishme me greko-katolikët e me ortodoksët e vendit dhe të kujdesen për meshtarët
e ardhshëm.
(27.09.2007 RV)Të manifestojnë, në çdo rrethanë, frymën e bashkimit ndërmjet
katolikëve të riteve të ndryshme. Kjo është porosia kryesore që u dha Benedikti XVI
ipeshkvijve ukrainas të ritit latin, me të cilët u takua sot në Kastel Gandolfo, në
përfundim të vizitës së tyre ‘ad Limina’. Ishte takimi i dytë, pas atij të së hënës,
në të cilin morën pjesë edhe prelatët katolikë të ritit grek. Sot Papa vuri në dukje
detyrat më të rëndësishme që e presin në të ardhmen Kishën e Ukrainës, duke theksuar
posaçërisht kujdesin për meshtarët, për thirrjet e reja meshtarake dhe për familjet. Ipeshkvijtë
e Kishës katolike ukrainase dëshirojnë reciprokisht ta fuqizojnë unitetin dhe bashkëpunimin
në të gjitha fushat e veprimtarisë baritore, duke nisur nga veprimtaria katekistike,
tek ajo liturgjike; nga ajo misionare, tek ajo bamirëse. Kështu u shpreh Benedikti
XVI, duke vlerësuar lart punën baritore të ipeshkvijve të cilët – siç theksoi Papa
– jetojnë në rrethana të vështira shoqërore, që kërkojnë prej tyre bujari e vetmohim
të përditshëm. Por, ashtu siç nënvizoi edhe gjatë takimit të fillimit të kësaj jave,
duke iu drejtuar ipeshkvijve greko-katolikë, Ati i Shenjtë i nxiti përsëri prelatët
e ritit latin të punojnë për dialogun dhe vëllazërimin ndërmjet dy traditave kishtare: “Edhe
ndërmjet katolikëve, bashkëpunimi nuk është gjithnjë i lehtë, duke qenë normale të
lindin qëndrime të ndryshme, po të kemi parasysh larminë e traditave përkatëse. Por
si mund të mos e shikojmë si mundësi providenciale faktin që na kujton bashkëjetesën
e dy bashkësive me tradita të ndryshme, megjithatë plotësisht katolike, të dyja në
shërbim të të vetmit Kyrios e të kumtimit të Ungjillit? Bashkimi i katolikëve, në
larminë e riteve dhe përpjekja për ta manifestuar këtë në të gjitha fushat, zbulon
fytyrën e vërtetë të Kishës Katolike dhe është shenjë më se e qartë edhe për të krishterët
e tjerë, ashtu si për mbarë shoqërinë”. Me gjithë trashëgiminë e hidhur që
la pas sundimi komunist, gjurmët e të cilit janë të dukshme në shpirtin e breznive
të sotme - shpjegoi Papa – fuqizimi i unitetit të brëndshëm të bashkësive katolike,
do ta bëjë më të lehtë edhe vijimin e dialogut ndërmjet Kishës katolike dhe Kishave
e bashkësive të tjera kishtare. Tek ju ndjehet posaçërisht nevoja e dialogut ekumenik
– u tha në përfundim Papa prelatëve të Ukrainës – sepse prej shekujsh jetoni së bashku
me vëllezërit tanë ortodoksë e me ta përpiqeni të zhvilloni një dialog të përditshëm,
që gjen shprehjen e vet në të gjitha aspektet e jetës.Duke kaluar, pastaj, në temat
baritore, Benedikti XVI i ftoi ipeshkvijtë ukrainas të kenë kujdes që në seminare
t‘u sigurohet një formin i harmonishëm dhe i plotë dëshirtarëve për rrugën e meshtarisë,
pa harruar edhe formimin e përhershëm të vetë meshtarëve, të rregulltarëve, të laikëve
si dhe veprimtarinë baritore në gjirin e familjeve.