Vizita ‘ad Limina’ e ipeshkvijve të zonave arabe. Intervistë me patrikun e Jeruzalemit,
Mishel Sabah.
(14.01.2008 RV)Ipeshkvijtë latinë
të zonave arabe, që i përkasin Konferencës me të njëjtin emër (CELRA), do të jenë
që sot e deri të shtunën e ardhshme për vizitë ‘ad Limina’ në Vatikan. Benedikti
XVI priti sot paradite grupin e parë të prelatëve, kryesuar nga Patriku i Jeruzalemit
të latinëve, imzot Mishel Sabah. Është fjala për barinj që kryejnë misionin e tyre
në troje ku banorët e krishterë – të organizuar në bashkësi jo aq të qëndrueshme,
posaçërisht në se krahasohen me ato myslimane – duhet të përballojnë ditë për ditë
situata të vështira, konflikte e kriza të rënda humanitare. Por edhe troje ku krishterimi
ka rrënjët e veta më të shenjta e më të lashta, vende nga të cilat buroi e buron gjithnjë
mesazhi i shpresës. Izraeli e Palestina, Iraku e Arabia, Somalia e Briri i Afrikës
- të kujtosh këto emra, është njëlloj si flasësh për troje ku nisin rrënjët e të
gjitha feve botërore e për toka ku lindin tensionet më delikate në fushën gjeopolitike
aktuale. Toka ‘shenjte’ të historisë e toka të gjakosura të kronikës, ku Kisha lindi,
jeton në minorancë e ndodhet përballë epërsisë së Islamit. Këto Kisha kanë ardhur
sot tek Benedikti XVI, me ngarkesën e përvojës së tyre baritore, me vështirësitë ambientale
e shpresat për një ardhmëri më të mirë, për të cilën Papa është tepër i interesuar.
Dioqeza e Konferencës së ipeshkvijve latinë të Zonave Arabe (CELRA) që ka një
numër më të madh katolikësh, është ajo e patriarkanës latine të Jeruzalemit. Përfshin
Izraelin, Palestinën, Jordaninë e Qipron. Bashkësia përbëhet nga 170 mijë vetë, shumica
me origjinë palestineze, të cilëve u duhen shtuar edhe të huajtë rezidentë, rregulltarë
e laikë, si edhe ndonjë i krishterë me origjinë hebraike. Brenda Patriarkanës latine
të Jeruzalemit – rast unik për të gjitha Kishat katolike të Tokës Shenjte - është
edhe një Seminar i lashtë, të cilit nuk i kanë munguar kurrë thirrjet, që nga viti
1848 kur u themelua. Dioqeza ka 60 famulli me 90 meshtarë: ipeshkvij, patrikë e rregulltarë,
me moshë mesatare 50 vjeç, gjë që flet për një kler të ri, që është i thirrur të
kujdeset për një bashkësi të krishterë, e cila shpërbëhet vazhdimisht për shkak të
mungesës së stabiltetit kronik në zonë. Pikërisht në këto troje lindi, predikoi,
u kryqëzua e u ngjall Jezu Krishti, prandaj edhe quhen “Toka të Shenjta”. E tillë
është edhe toka libaneze, me mozaikun e pakicave fetare: maronitë, grekë melkitë,
katolikë, armenë-katolikë, siro-katolikë e kaldej – gjithsejt 800 mijë katolikë, 18
mijë nga të cilët i përkasin Vikariatit të Beirutit. Duhet të theksojmë se edhe
në Siri, për shkak të refugjatëve irakianë, numri i katolikëve vijon të rritet çdo
ditë. Në sa pakësohet vazhdimisht në Bagdad, ku më 2004 kishte dy mijë të pagëzuar,
ndërsa sot - një prani gati të pandjeshme. Duke kaluar në Afrikë, duhet të kujtojmë
së pari Vikariatin e lashtë apostolik me seli në Aleksandri të Egjiptit, i cili shtrihet
në një territor, ku banojnë 214 mijë katolikë të të gjitha riteve. Bashkësia e ritit
latin numron 30 mijë besimtarë, të shpërndarë në 17 famulli. Por, përveç Egjiptit,
Konferenca përfshin edhe Somalinë e Gjibutin. Ndërsa Vikariati i Arabisë, që
e ka selinë në Ad Abu të Kuvaitit, kujdeset për të gjithë katolikët e gadishullit
arabik. Ja si shprehet, në mikrofonin e Radio Vatikanit, patriku Mishel Sabah
për përparësitë e punës baritore në Patriarkanën latine të Jeruzalemit: Përgjigje
- Detyra jonë e parë është katekizmi, sepse të krishterët duhet të jenë të krishterë
jo vetëm për emër, por të krishterë që e pranojnë krishterimin në mes të një bote
jo të krishterë. Bota në përgjithësi nuk është e krishterë, aq më tepër bota jonë.
Vendet në të cilat jetojmë janë vende arabe, vende myslimane, e numri i katolikëve
është shumë i kufizuar. Bëhet fjalë, prandaj, jo vetëm për ta pranuar fenë e krishterë,
por sidomos për ta jetuar. Prandaj duhet ta kuptojnë mirë ç’do të thotë ta jetosh
krishterimin në një shoqëri jo të krishterë, si mund të jesh dëshmitar i Jezusit ndërmjet
jo të krishterëve. Problemi i katekizmit lidhet ngushtë me atë të emigrimit. Emigrimi
nuk duhet të ketë vetëm kuptimin e kërkimit të një jete më të mirë, por kryesisht
atë të pranimit ose të mospranimit të thirrjes si i krishterë, të thirrjes për të
jetuar në atë shoqëri, ku na do vetë Zoti.