Рада Міністраў зацьвердзіла новае Палажэньне пра парадак запрашэньня ў краіну замежных
сьвятароў. Цяпер для прыезда любога замежніка, які будзе займацца рэлігійнай дзейнасьцю,
патрэбны дазвол Упаўнаважанага па справах рэлігіяў і нацыянальнасьцяў. Прычым, сьвятару
можа быць адмоўлена без тлумачэньня прычынаў. Афіцыйна дакумэнт прыняты для
ўпарадкаваньня рэлігійнай дзейнасьці ў Беларусі замежнікаў. Закране ён, найперш,
ксяндзоў-палякаў, якія прызжаюць служыць у беларускія касьцёлы. Такія прыезды сталі
часьцейшыя за апошнія гады. Па адной з вэрсыяў, прыняцьце дакумэнта актыўна лабіявала
Беларуская праваслаўная царква, якая хвалюецца ад вялікай актыўнасьці каталікоў у
краіне. Цяпер, у адпаведнасьці з дакумэнтам, давядзецца прасіць дазволу на прыезд
ня толькі ксяндзам, якія едуць у касьцёлы, але і сьвятарам, якія будуць выкладаць
у духоўных навучальных установах, і нават тым, хто будзе ехаць проста на сьвята, сэмінар
ці любое мерапрыемства. Кожны замежны сьвятар, які будзе ад цяперашняга часу кіравацца
ў Беларусь, павінен будзе падаць цэлы пакет папераў, каб пацьвердзіць сваю кваліфікацыю
і добрыя мэты. Сярод папераў – дакумэнты аб адукацыі і рэлігійным стажы. Для выкладчыкаў
яшчэ – плян навучальнай працы. Самая радыкальнае новаўвядзеньне – тэст на адную
зь дзяржаўных моваў, беларускую ці расейскую. Бо па новых правілах службы ў храмах
мусяць адбывацца толькі на дзяржаўных мовах. Ксяндзы, якія зьвяртаюцца да вернікаў
па-польску, будуць пакараныя і нават высланыя з краіны. Калі сьвятар, які едзе
ў Беларусь, адмовіцца падаць любы зь неабходных дакумэнтаў, ягоная позва будзе пакінутая
без разгляду. Сярод беларускіх вернікаў ужо пайшоў жарт: што ж давядзецца перажыць
Папу Бэнэдыкту XVI, калі той раптам вырашыць прыехаць у Беларусь…