365 ditë: "Kjara Lubih na mëson ta vëmë Ungjillin në jetë ditë për ditë".
(02.12.2008 RV)Ja, po rifillojnë!
Sirenat ulërijnë përnjëherësh e duhet vrapuar përsëri ndër strehime, për t’u mbrojtur
nga bombat. Qyteti i Trentos dridhet nën avionët armiq e popullsia fshihet me tmerr.
E sa herë që, gjatë alarmeve, popullsia fshihet në strehime, disa vajza mblidhen e
lexojnë Biblën, e vetmja gjë që marrin me vete, kur ikin me vrap nga shtëpitë. Një
mësuese e re, Kjara Lubih, u lexon të tjerave fragmente nga Ungjilli. Ndërsa bombat
vijonë të bien, vajzat meditojnë për kuptimin e Shkrimeve Shenjte e, shumë shpejt,
e kuptojnë në thellësi të zemrave se nuk mjafton ta lexosh Biblën; duhet ta jetosh. Lëvizja
e Fokolarëve apo e Vatrorëve lind më 7 dhjetor 1943. Këtë ditë, në fshehtësinë e zemrës,
Kjara Lubih, themeluesja, ia dhuron gjithë jetën e vet Zotit. Vatroret e para janë
shoqet e saj të strehimt, laike që i kushtohen Hyjit. Lëvizja rritet me shpejtësi
të madhe. Rregulltarë e laikë, të martuar e të pamartuar, bashkohen me Kjarën, për
të vënë në jetë ndjetin e saj “Që të gjithë të bëhen si ne, një gjë e vetme!”. Fokolarinët
kanë një qëllim të vetëm: të jenë dashuri, që bashkon njerëzit. Në një kohë tepër
të shkurtër, Lëvizja e Fokolarëve apo e Vatrorëve, përhapet në mbarë botën. Është
një pemë në lulëzim, që vijon të japë fryte të begata, duke thithur ushqimin e nevojshëm
nga leximi i Ungjillit e lutja drejtuar Marisë. Maria i prin Lëvizjes e të gjithë
Fokolarinët përpiqen që jeta e tyre t’i ngjasë jetës së Nënës së Zotit. Në se nga
njëra anë Maria është prijëse shpirtërore e Lëvizjes, nga ana tjetër është Krishti
ai, që përcakton programin: “Bashkim vëllazëror universal!”. “Jemi një grup i vogël,
që ndihmon Kishën për të realizuar detyrën e ngarkuar nga Krishti: ’Që të gjithë të
jenë një!”- shpjegon Kiara.E për ta realizuar këtë ideal, mësuesja e re nuk kënaqet
vetëm me fjalë të bukura, por vepron konkretisht. Punon për bashkimin vëllazëror të
të gjithë njerëzve, duke ua hapur zemrën edhe të tjerëve, të krishterë ose jo. Përshpirtëria
e Lëvizjes së Fokolarëve bazohet mbi dashurinë e gjuha e tyre është e kuptueshme për
të gjithë. Doni prova? Kjarën e ftojnë kudo, në Kisha, në Parlamentin evropian, në
xhami, në tempuj budistë... E kudo që shkon, flet për dashurinë e shpresën, që janë
motori i jetës vëllazërore. Po ku e merr gjithë këtë energji? Nga besimi i patundur
në Ungjillin, që përpiqet ta jetojë ditë për ditë!