Kujtojmë Atë Gjergj Fishtën në 68 vjetorin e vdekjes.
(30.12.2008 RV)Deka e vorrimi
i parë: Dita e 30 dhetorit të vjetës 1940 regjistrohet në të gjitha kronikat
historike të Shqipnisë, në prag të një robnie të re. Poeti Kombëtar kishte ndërrue
jetë! Të nesërmën vonë, një grup zhgunamurrtësh hapte me zemër të këputun, vorrin
e Poetit. Për me ia plotësue dishirin e mbram “Një kryq druni, t’kjosha true/ Nxire
e venma përmbi krye!”- i vunë te kryet një kryq dullije. Por me kenë se ai nuk
kishte dekë, sepse Kangatari i Lahutës nuk mund të desë kurr, historia e jetës së
tij nuk u mbyll nën rrasën e akullt, që sivëllazënt me kapuçat françeskanë ulun fort
mbi sy, për me mshehë lotët-rrëkajë, vunë mbi reliket e tij.
Zhvorrimi vandal:
Ende
nuk ishin terë lotët, kur në kishë hynë furishëm ata që e quejshin veten çlirimtarë.
Thue kishin ardhë me çlirue të dekunin prej vorrit? Thue prandej i hoqën me aq turr
kunorat me lule, flakën kryqin e thjeshtë prej dullije e gërricën shkrojlat, tue e
lanë rrasën e ftohtë, të bardhë prej mermeri, pa emnin e tij? Apo kishin ardhë me
e çue prej vorrit për ta martirizue, ashtu si bashkëvëllazënt? Me bindjen se nuk
do ta çonte kurrë ma rrasën. Fillë mbas vorrit do t’i vinte radha kishës: më 6
shkurt edhe asaj kujtuen se i erdh fundi. E tek e kthejshin tempullin e Hyjnisë në
teatër sukujsh, papritë u kujtuen se ai s’kishte dekë. Ai ishte gjithnjë aty! Atëherë
u dynden rishtas te Vorri pa emën. E hapën me mllef. I nxorën ngutshëm eshtënt dhe
i flakën në Dri. Besuen se tashma kishte marrë fund, se s’do t’i ndigjohej ma zani. Por
Kangatari i “Mrizit të Zanave”, i mbetun pa vorr, si Skënderbegu, vijoi të jetonte
strukë në kujtesën e në legjendën e Kombit, bashkë me herojtë e epopesë së tij. Tue
pritë me e çue prap rrasën.
Ringjallja:
E
u ringjall, sapo Kombi bani përpjekjet e para për t’u kthye në jetë! U ringjall
50 vjet mbasi i kishte mbyllë sytë, më 28 dhetuer 1990, në sallën e Lidhjes së Shkrimtarëve
e Artistëve në Tiranë, shi aty ku ishte hedhë aq shumë baltë mbi emnin e tij të pamort.
Mandej, më 30 dhetuer 1990, në Klubin e Rinisë, në Shkodër, prej kah ishin flakë jashtë
bashkëmotrat stigmatine e ishin shqiptue dënimet me vdekje të bashkëvëllazënve. Me
13 dhetuer 1995 në fundin e kishës françeskane të Gjuhadolit, që po rindërtohej, filluen
gërmimet shi në atë vend ku ai kishte zdrypë 55 vjet ma parë. Nën copat e tullave
dhe materialit të ndërtimit që mbushte vorrin, ai u gjet rishtas: dolën nga dheu
grimca eshtënsh të shkapërhapuna, të harrueme prej ngutit e tmerit të gjestit makabër.
Zoti kishte premtue që të ruheshin pikërisht eshtënt e dorës së tij të djathtë, të
asaj dore që shkroi “Lahutën e Malcis”, “Mrizin e Zanave”, “Vallen e Parrizit”, “Anzat
e Parnasit”, “Jerinën”, “Gomarin e Babatasit”… mija e mija vargjesh e rreshtash që
duken si të shkrueme sot e për sot! "Eshtënt e kësaj dore sot në vend të
vet i vendojmë dhe breznive të ardhshme trashigim ua lâmë, se pa ketë dorë Shqiptari
“epopé” s’do të kishte pasë as në Lahutë kurr gishtat s’do t’ i kishte dridhë për
të këndue homerisht Oso Kukë e Marash Ucë, Ali Pashë e Dedë Gjo’ Lulë, Pater Gjon
e Tringë. Emni i tij gjallon brezní në brezní! Gati
një gjysë shekulli harresë e imponueme. U rrafshue vorri, por nuk u zhduk emni; shtatorja
e tij vigane u përjashtue prej Panteonit te shkrimtarëve, prej Olympit të poetëve,
por Fishta gjalloi i kërthnesët ndër zemra dhe ndër to kthelloi rrâjë e rriti dashtëní.
Fara që s’des, nuk ep fryt - tha Mjeshtri hyjnuer i né, katolikëve. (Nga Fjalimi i
At Danjel Gjeçajt në rivorrimin e eshtënve të Fishtës). E
u ringjall më 29 dhetuer 1996, kur emni i madh u duk rishtas mbi rrasë: vorri u rindërtue
e mbi te ngadhënjeu Kryqi i dullijës!U ringjall edhe më 1999, kur me nismën e 19 studiuesëve,
në Tiranë u përurue Instituti i Studimeve me emnin e tij “Gjergj Fishta”. E tash
ata që nuk e kanë harrue kurrë, e shohin përsëri të gjallë, thadrue në mermer, në
mjedis të Shkodrës, që e deshti aq fort.