(08.05.09 RV)E me rastin e festës së sotme të Zojës Rruzare në shenjtoren e
Pompeit, në praninë e mijëra besimtarëve, u rinovua në mesditë tradita e Lutjes drejtuar
Shën Marisë. Është një lutje e veçantë, hartuar në vitin 1883 nga i Lumi Bartolomeo
Longo, me rastin e bekimit të këmbanës së parë të shenjtores në Pompei. Para lutjes,
mesha solemne e kryesuar nga kardinali kryeipeshkëv Ruini. Lutja e Pompeit është
veçanërisht e bukur, e përkushtuar, e frymëzuar nga vetë Zoja, e cila iu duk Bartolomeo
Longos, avokat i ri italian, dhe i tha t’ia kushtonte jetën devocionit të Rruzares
dhe përhapjes së saj, duke e bërë luginën e Pompeit vend kushtuar Jezusit e Zojës
së Bekuar e pikë referimi për gjithë Kishën. Ja si përfundon lutja: “O Rruzare
e bekuar nga Shën Maria, zinxhir i ëmbël që na lidh me Zotin, vjegëz dashurie që na
bashkon me Engjëjt, kullë shpëtimi, në sulmet e ferrit, port i sigurtë në rast mbytjeje
të përgjithshme, ne nuk do të lëshojmë më kurrë nga dora. Ti do të jesh ngushëllimi
ynë në agoni, për ty puthja e fundit e jetës që shuhet. Fjala e fundit që del prej
buzëve tona, do të jetë emri yt hyjnor o Mbretëreshë e Rruzares së Pompeit, o nëna
jonë e dashur, o Strehë e mëkatarëve, o Sovrane ngushëlluese e të hidhëruarve. Qofsh
kudo e bekuar, sot e përgjithmonë, në tokë e në qiell. Amen” Po kujtojmë se Lutja
e përgjëruar është njëkohësisht lirikë dhe muzikë. Mbi ato faqe janë derdhur lumenj
lotësh e janë stampuar miliarda puthje njerëzish që besojnë në Hyjin. Në këtë lutje
universale, derdhen të gjitha dhimbjet e shpresat e familjes njerëzore. Është kaq
e përkryer rezonanca që ajo ngjall në çdo zemër të krishterë, saqë secili kur e thotë
ka përshtypjen se po e harton ai vetë për herë të parë. Mund të thuhet se autori i
vërtetë nuk është Bartolomeo Longo, por shpirti popullor, feja e popullit. Është Kisha
që ecën në botë e lutet.