Benedikti XVI gazetarëve në avionin e kthimit nga Toka Shenjte: në Lindjen e Mesme
ekziston vullneti për paqen, që duhet inkurajuar.
(17.05.2009 RV)Java e kaluar u
karakterizua nga përfundimi i udhëtimit të Papës Benedikti XVI në Tokën Shenjte, shtegtim
që filloi më 8 maj e u mbyll më 15, me thirrjen e fuqishme të Papës në aeroportin
e Tel Avivit në Izrael: “Kurrë më dhunë! Kurrë më luftë! Kurrë më terrorizëm!” Gjatë
kthimit në Romë, ku mbërriti të premten, Ati i Shenjtë foli me gazetarët, duke përmbledhur
përvojën e përshtypjet e tij nga vizita. Ta dëgjojmë: “Mund të citoj shumë
e shumë detaje: zbritja mallëngjyese në pikën më të thellë të tokës në Lumin Jordan,
që për ne është edhe simbol i zbritjes së Zotit, i zbritjes së Krishtit në nivelin
më të thellë të ekzistencës njerëzore. Çenakullin, ku Zoti na dhuroi Eukaristinë,
ku ndodhën Rrëshajt, zbritja e Shpirtit Shenjt; pastaj Varri i Krishtit, e shumë përshtypje
të tjera… …Tri janë përshtypjet e mia kryesore: e para është se gjeta kudo,
në të gjitha ambientet, myslimane, kristiane, hebre, gatishmërinë e vendosur për dialogun
ndërfetar, për takimin, bashkëpunimin ndërmjet feve. Është e rëndësishme që të gjithë
ta shohin këtë, jo vetëm si një veprim – të themi – të frymëzuar nga motive politike,
që kanë të bëjnë me situatën, por si fryt i së njëjtës bërthamë, mbi të cilën bazohet
feja, pasi besimi në Zotin e vetëm, që na ka krijuar të gjithëve, në Atin tonë, besimi
në këtë Zot, që e ka krijuar njerëzimin si familje, besimi se Zoti është dashuri e
do që dashuria të jetë forca dominuese e botës, përmban në vetvete takimin, nevojën
e tij, të dialogut, të bashkëpunimit, si kërkesë e vetë fesë. Pika e dytë:
gjeta edhe një atmosferë ekumenike mjaft inkurajuese. Kemi pasur shumë takime të përzemërta
me botën ortodokse; munda të flas edhe me një përfaqësues të Kishës anglikane e me
dy përfaqësues luteranë, dhe shihet që klima në Tokën Shenjte inkurajon edhe ekumenizmin. E
pika e tretë: Ka vështirësi të jashtëzakonshme – e dimë, e pamë, e dëgjuam. Por pashë
edhe se ekziston një dëshirë e madhe për paqen nga ana e të gjithëve. Vështirësitë
janë më të dukshme e nuk duhet t’i fshehim: ekzistojnë e duhen sqaruar. Por jo kaq
e dukshme është dëshira e përbashkët për paqe, vëllazërim, e më duket se duhet të
flasim edhe për këtë, duhet t’i inkurajojmë të gjithë për të gjetur zgjidhjet natyrisht
jo të lehta, për këto vështirësi. Shkova si shtegtar i paqes. Shtegtimi
është element thelbësor i shumë feve. Është edhe i Islamit, i fesë hebraike, i krishterimit.
Është edhe një figurë e ekzistencës sonë, është ecja përpara, drejt Zotit e kështu,
drejt bashkimit të njerëzimit. Shkova si shtegtar e shpresoj që shumë t’i
ndjekin këto gjurmë e kështu, të inkurajojnë bashkimin e popujve të Tokës Shenjte,
që të bëhen pastaj lajmëtarë të paqes”.