Боль вернікаў па прычыне разбурэньня крыпты ў падмурках уніяцкага храма Сьвятога Духа
ў Менску
13 кастрычніка 2009 г. у ніжняй капліцы “чырвонага касьцёла” грэка-каталіцкія вернікі
сабраліся на малітву за спакой душы невядомага слугі Божага, які спачываў у зьнішчанай
крыпце, што знаходзілася ў старых фундаментах уніяцкага храма Святога Духа ў Менску.
Узгдваліся ў малітве і іншыя захаваныя там бязыменныя асобы.
Заўпакойную Літургію
служылі менскія грэка-каталіцкія душпастыры а. Яўген Усошын і а. Пахом Кавалёў у прысутнасьці
Апостальскага Візітатара для грэка-католікаў Беларусі Архімандрыта Сяргея (Гаека).
Пасьля
Боскай Літургіі Архімандрыт Сяргей узначаліў паніхіду за ўсіх памёрлых, чые астанкі
і косьці былі знойдзены у падмурках базыліянскай царквы Сьвятога Духа. “У малітве
хочам аддаць Госпаду наш глыбокі боль па прычыне разбурэньня пахавальнай крыпты і
прафанацыі парэштак захаванага там сьвятаслужыцеля” – сказаў а. Яўген перад паніхідай.
Як
вядома на пачатку мінулага месяца верасьня, падчас працы коўш экскаватара прабіў невядомую
крыпту (пахавальны склеп), не пазначаную ні на адным з планаў царквы. Былі выкліканыя
спецыялісты з Інстытута археалогіі НАН Беларусі, якія пачалі прафесійна раскопваць
крыпту. Астанкі фундатараў царквы засталіся некранутымі, нягледзячы на нешчасьлівы
лёс храма. Побач са знойдзеным склепам была знойдзена шмат раскіданых касьцей.
“Для
вернікаў і для ўсіх цывілізаваных людзей парэшткі памерлых - гэта рэч сьвятая. Нашыя
продкі, якія там пахаваныя, жыхары і дабрадзеі горада Менска, маюць права на пашану
з боку ўсіх жыхароў Менска. Грэка-каталіцкія вернікі чакалі, каб годна, з малітвай,
пахаваць у адным з месцаў новых фундаментаў будоўлі сабраныя косьці. Мы чакалі таксама,
згодна з абяцаньнямі працаўнікоў КУП “Мінская спадчына,” на прафесійны перанос крыпты.
На жаль у мінулы чацьвер - 8.10.2009 г. вечарам працаўнікі КУП “Мінская спадчына”
разбілі крыпту і зьняважылі астанкі захаванага там манаха” – дадаў з болем а.
Яўген.
У нядзелю вечар 11.10.2009 Апостальскі Візітатар Беларускай Грэка-Каталіцкай
Царквы Архімандрыт Сяргей (Гаек), у суправаджэньні віцэ-дэкана а. Яўгена Усошына,
пайшоў паглядзець асабіста на месца раскопкаў. Там яны пабачылі варварскі зьнішчаную
(разьбітую) крыпту, раскіданыя часткі труны і косьці нябошчыка. Акт дзікага варварства,
зьдзейсьнены над спадчынай грэка-каталіцкай (уніяцкай) Царквы, у цэнтры еўрапейскага
гораду - сталіцы нашай Рэспублікі Беларусь, побач сьвятых месцаў братоў рыма-католікаў
і праваслаўных. “Жах і боль не пазваляе нам каментаваць гэты
акт дзікага варварства” – сказаў Архімандрыт Сяргей.
“Мы,
грэка-каталіцкія вернікі г. Менска, удзячныя дзяржаўным Уладам і прадстаўнікам аддзела
па справах рэлігій і нацыянальнасьцей Мінскага гарвыканкама за падтрымку патрабаваньня
Кіраўніцтва нашай Царквы, каб крыпта была адбудаваная (рэканструяваная) ды каб сьвятыя
парэшткі нашых продкаў маглі быць ізноў, з пашанай і нашай малітвай, складзены на
месцы, дзе яны былі першапачаткова захаванымі” – сказаў адзін з вернікаў – удзельнікаў
малітвы. “Мы ўдзячныя шматлікім хрысьціянам розных канфесіяй за малітоўную і
маральную падтрымку нашых патрабаваньняў” – дадаў а. Яўген.