(27.11.2009 RV)Agjensia ndërkombëtare për energjinë atomike (IAEA) miratoi
sot në Vjenë një rezolutë “çensure” kundër Teheranit, për mungesën e bashkëpunimit
në programin bërthamor. Irani dënohet se deri në tetor, ka mbajtur fshehur ndërtimin
e një impianti të ri bërthamor. Gjithashtu, ka refuzuar ofertën e fundit
të Agjensisë për të pasuruar jashtë vendit uraniumin e tij. Ambasadori iranian pranë
agjensisë ndërkombëtare e quajti këtë rezolutë si dëm të madh për atmosferën e bisedimeve
ndërmjet Teheranit dhe IAEA-s mbi programin bërthamor. Rezoluta e Këshillit
të guvernatorëve të agjensisë, ku bëjnë pjesë 35 vende, mori kësaj radhe edhe mbështetjen
jo të zakontë të Kinës e të Rusisë. Ka mundësi që të pasojnë sanksione të reja ndërkombëtare
kundër vendit të Ahmadinexhadit.