“Vuajtja e mrekullitë” – editorial i Atë Federiko Lombardit
(14.02.2010 RV)“Vuajtja e mrekullitë” titullohet editoriali i Atë Federiko
Lombardit për të përjavshmen informative të Qendrës Televizive të Vatikanit:
“Vuajtja
e pranuar dhe e dhuruar, pjesëmarrja e sinqertë e pa asnjë interes në vuajtjen e të
tjerëve, thua nuk janë mrekulli të dashurisë? “Kush rri për një kohë të gjatë pranë
njerëzve që vuajnë, njeh nga afër ankthin e lotët, por edhe mrekullinë e gëzimit,
fryt i dashurisë”. Me të drejtë Papa deshi ta kremtojë solemnisht e ta kryesojë
personalisht Meshën për ditën e të sëmurëve, e edhe të vërë në dukje me fjalët e tij,
cilat janë mrekullitë e vërteteta, domethënë shenjat, që tërheqin mrekullinë, sepse
ndriçojnë më thellësisht realitetin e pafundmë të vuajtjes njerëzore. “A
nuk duhet të vuante Krishti e kështu të hynte në lumninë e vet?” u thotë Jezusi dishepujve
të pangushëlluar të Emausit. Në se vuajtja e tij, pambarimisht e madhe, ishte e nevojshme
për ta bërë të dukshme dashurinë e Zotit, edhe ne e marrim me mend se vuajtja është
vendi, ku dashuria – e vënë në provë të rëndë - duket në mënyrën më të fuqishme e
më të pastër. Në ligështinë e të sëmurit rëndë shihet gjithnjë më qartë se lidhja
e dashurisë, që jepet e që merret, është zbulim i vërtetë i kuptimit të një jete,
që thjeshtohet në gjërat më thelbësore; të gjitha të tjerat nuk kanë më asnjë pikë
kuptimi. Nuk e dimë në se mund të mendohet një botë pa vuajtje! Në botën
tonë ka një det me dhimbje, që nuk prek vetëm zemrën e njeriut, por edhe atë të Zotit,
e që mund të shprehë dashuri. Por, a mund të kuptohet e të jetohet domethënia misterioze
e vuajtjes, në një botë pa Zotin e pa Kryqin e Krishtit? Është pambarimisht e vështirë,
ndoshta e pamundur! Prandaj vuajtja është pjesë themelore e jetës dhe e shërbimit
ndaj Kishës. Për të shpëtuar shpresën e botës”.