Papa i Lum: entuziazëm në takimin përgatitor të DBR-së në Madrid. Festa e procesione
në Poloni.
(14.01.2011 RV)Fjala, që dëgjohet më shumë, është “fantastike”. Në të gjitha
gjuhët e botës! Gjon Pali II do të shpallet i Lum e të rinjtë e DBR-së, nuk mund të
mos festojnë. Në kryeqytetin spanjoll është në vijim e sipër takimi II përgatitor
i ngjarjes e në Eskorial, siç quhet pallati i lashtë i Perandorit Filipi II, janë
mbledhur delegacionet e 84 Konferencave ipeshkvnore kombëtare si dhe përfaqësuesit
e 44 lëvizjeve e shoqatave. Lajmi i madh arrin mes tyre nga fundi i punimeve të paradites
e, natyrisht shpërthen menjëherë entuziazmi. Dëgjohen brohoritje: “Më 1 maj do të
jem në radhë të parë, në Romë!”; “Fantastike”; “Nuk kam pasur kurrë dyshime për shenjtërinë
e Gjon Palit II”. “Por ta shikosh të pranuar edhe nga Kisha, është vërtetë prekëse”. Këto,
vetëm pak nga reagimet e nxehta të 300 delegatëve, që përgatisin takimin e ardhshëm
të DBR-së, i cili do të mbetet, pa dyshim, shpikja më e madhe e papnisë së Karol Vojtilës.
“Jemi të rinjtë e Tij, prandaj sot nuk mund të mos festojmë e të lutemi për Të
- brohorasin të rinjtë. E ndjenjat e tyre i përmbledh kardinali Stanislao Rilke, kryetar
i Këshillit Papnor për Laikët e dëshmitar pamor i lindjes së DBR-së. “Jam i
lumtur e i prekur thellë nga ky lajm – deklaroi kardinali polak - e posaçërisht nga
koha kur e mora, në sa përgatitemi për DBR-në. Karol Vojtila ka qenë gjithnjë mik
i ngushtë e i të rinjve, por mik kërkues, e thirrja e tij për t’i mbledhur djemtë
e vajzat e mbarë botës, ka vlerë edhe për sot, për epokën e internetit e të rrjeteve
shoqërore. Ishte vërtet një vendim profetik, krejtësisht kundër rrymës, që vijon të
japë frytet e veta. Fryte shenjtërie”.