Papa gjatë lutjes së Engjëllit të Tënzot: asistencë e ndihmë për popullsitë e Libisë.
Në lutjen e djeshme të Engjëllit të Tënzot, kremtuar në Sheshin e Shën Pjetrit, në
Vatikan, përplot me besimtarë e shtegtarë nga vende të ndryshme të Italisë e të botës,
Benedikti XVI kujtoi, me emocion të thellë, ministrin pakistanez, Shahbaz Bhati, vrarë
të mërkurën e kaluar nga një grup fanatikësh islamikë. Ati i Shenjtë uroi që vdekja
e tij të zgjojë në ndërgjegjet e të gjithë besimtarëve, impenjimin për të mbrojtur
lirinë fetare. Më pas, mendimi i Benediktit XVI shkoi në Libinë e tronditur rëndë
nga vringëllimat e armëve, duke e siguruar popullsinë e këtij vendi kaq të vuajtur,
për praninë në lutjet e në kujdesin e tij. Para thirrjeve, Papa u ndalua posaçërisht
tek Fjala e Zotit, që duhet të jetë në qendër të vëmendjes në jetën e gjithë të krishterëve.
Benedikti
XVI është pranë të gjithë njerëzve, të krishterë ose jo, që vuajnë për shkak të dhunës.
Në lutjen e djeshme të Engjëllit të Tënzot, Papa nënvizoi se i ndjek vazhdimisht e
me vëmendje të madhe tensionet, që po trondisin këto ditë disa vende të Afrikës e
të Azisë. Më pas kujtoi ministrin pakistanez katolik, Bhatin, vrarë sepse i kundërvihej
ligjit mbi blasfeminë: “I lutem Zotit Jezus që flijimi prekës i jetës së ministrit
pakistanez Shahbaz Bhati, të zgjojë në ndërgjegjet e besimtarëve guximin dhe impenjimin
për të mbrojtur lirinë fetare të të gjithë njerëzve, duke promovuar, kështu, dinjitetin
e tyre të barabartë”. Më pas Ati i Shenjtë nënvizoi se i ndjek me vëmendje e kujdes
ngjarjet, që po jeton këto ditë populli i Libisë: “Mendimi im drejtohet, pastaj,
nga Libia, ku ndeshjet e kohëve të fundit shkaktuan vdekje të panumërta e krizë humanitare
në rritje. Të gjitha viktimat e të gjithë ata, që jetojnë me ankth në zemër, i siguroj
se lutem, se jam pranë tyre e se bëj thirrje që popullsitë e dëmtuara të mos mbeten
pa ndihmë e solidaritet”. Para fjalëve kushtuar ministrit Bhati dhe situatës
në Libi, Papa komentoi Ugjillin e së dielës, duke u përqendruar tek shembëlltyra e
dy shtëpive, njëra e ndërtuar mbi shkëmb e tjetra mbi rërë. Theksoi, kështu, një nga
gjashtë shembëlltyrat, që i kushtohen urtisë e të kujtojnë se ai që e dëgjon Fjalën
e Zotit e që e shtie në punë, “i përngjan njeriut i cili, kur e ndërtoi shtëpinë e
vet, e mihi dheun thellë dhe themelin e vuri mbi shkëmb. Vërshoi uji, lumi u vërsul
mbi atë shtëpi, por ajo nuk u tund, sepse i kishte themelet mbi shkëmb. Kurse ai,
që e dëgjon Fjalën, por nuk e vë në veprim, i ngjet njeriut, i cili e ndërtoi shtëpinë
përmbi rërë, pa themel! U vërsul mbi të lumi e e rrëzoi sakaq: ajo shtëpi u bë gërmadhë
e madhe”: “Në çdo epokë e në çdo vend, kush ka hirin ta njohë Jezusin, posaçërisht
përmes leximit të Ungjillit Shenjt, mbetet i mahnitur, duke parë se me predikimin,
gjestet, Vetjen e tij, ai na zbulon fytyrën e vërtetë të Zotit e, njëkohësisht, na
ndihmon të kuptojmë vetveten, na bën të ndjejmë gëzimin e pafundmë të bijve të Atit,
që është në qiell, duke na mësuar, kështu, edhe të gjejmë bazën e shëndoshë, mbi të
cilën mund ta ndërtojmë pa frikë jetën tonë”. Por shpesh - vërejti Papa - njeriu
nuk e ndërton veprimtarinë e vet, jetën e vet, mbi këtë identitet. I pëlqen më shumë
rëra e ideologjive, e pushtetit, e suksesit, e parasë. I pëlqen, sepse mendon që kështu
mund të ndërtojë një jetë të sigurt e, sidomos, mund ta mbushë shpirtin me lumturinë
e ëndërruar, duke realizuar plotësisht vetveten: “E ne, mbi ç’ bazë duam ta
ndërtojmë jetën tonë? Kush mund t’i përgjigjet vërtetësisht ankthit, që provon zemra
njerëzore? Krishti është shkëmbi i jetës sonë! Ai është Fjala e amshuar e përfundimtare,
që të mbron nga çdo kundërshtim, nga çdo kundështar, nga çdo vështirësi, nga çdo vuajtje”. Në
përfundim Papa uroi që Fjala e Zotit ta përshkojë tejembanë jetën tonë, duke depërtuar
në çdo mendim, në çdo ndjenjë, në çdo veprim: “Të dashur vëllezër, ju porosit
t’i bëni vend ditë për ditë Fjalës së Zotit, të ushqeheni me të e ta meditoni vazhdimisht.
Është ndihmë e çmuar edhe në përpjekjen për t’u ruajtur nga aktivizmi i cekët, që
për një çast mund të të mbushë me krenari, por që në fund të fundit ta lë shpirtin
të zbrazët e të pakënaqur”.