Մեծ Պահոց Հոգեւոր Խորհրդածութեանց Ծիրին Մէջ. Գեղամ Արք. Խաչերեան Խօսեցաւ Փրկրագործութեան
Հասկացողութեան Մասին.
Մեծ պահոց խորհրդածութեանց ծիրին մէջ, երէկ` չորեքշաբթի, 23 մարտին, Հայաշէնի Ս. Յովհաննու
Կարապետ եկեղեցւոյ մէջ հսկումի արարողութեան ընթացքին կատարուեցաւ խորհրդածութիւն` խաչելութեան
պատկերին դիմաց, նիւթ ունենալով փրկագործութիւնը: Խորհրդածութիւնը կատարեց Լիբանանի հայոց
թեմի առաջնորդ Գեղամ Արք. Խաչերեան:
Առաջնորդ սրբազանը նշեց, որ Մեծ պահքի 40-օրեայ
շրջանին եկեղեցական արարողութիւններու ճամբով հաւատացեալը կը հրաւիրուի հոգեւոր կեանքի,
սկզբունքներու եւ արժէքներու մասին մտածելու, այսինքն` նիւթական աշխարհէն հեռանալու եւ
հոգեւոր աշխարհին մօտենալու: «Պահքի ուտելիքի կանոնը միջոց մըն է օգնելու անձին, որ կարենայ
հոգեկան աշխարհին բարձրանալ», բացատրեց առաջնորդ սրբազանը:
Անդրադառնալով «Խորհրդածութիւն
խաչելութեան պատկերին դիմաց» խորագիրին` Գեղամ արք. Խաչերեան նկատել տուաւ, որ Մեծ պահքի
ընթացքին 40 օր խորանին վարագոյրը փակ կ՛ըլլայ եւ մեր աչքերուն դիմաց կը տեսնենք խաչելութեան
պատկերը: «Վարագոյրին փակուիլը ցուցանիշ է, որ մարդ կտրուեցաւ Աստուծոյ հետ հաղորդակցութենէն»,
հաստատեց սրբազանը` աւելցնելով, որ երբ վարագոյրը բաց է, մարդ անհատը Աստուծոյ հետ կապի
մէջ է, իսկ անոր փակուիլը ցոյց կու տայ այն վիճակը, որ մարդ Աստուծմէ հեռու` եղաւ մեղքի
պատճառով: Ան հարց տուաւ ներկայ հաւատացեալներուն, թէ իրենք մտածա՞ծ են խաչելութեան պատկերի
իմաստին մասին` նշելով միաժամանակ, որ հոն կան զանազան իմաստներ: Առաջինը փրկագործութիւնն
է, որ կը նշանակէ այն ծրագիրը, որ կ՛իրագործուի մարդու փրկութեան համար, եւ մարդը կ՛ազատէ
ու կը փրկէ մեղքի գերութենէն:
«Մեղքը այն պարզ գործն է, որ Աստուծոյ կամքին հակառակ
է», հաստատեց առաջնորդ սրբազանը` աւելցնելով, որ մեղքը մարդը Աստուծմէ հեռացնող գործ
է: Գեղամ արք. Խաչերեան նաեւ նկատել տուաւ, որ Հին կտակարանը լեցուն է այնպիսի պատկերներով,
որոնք կը խորհրդանշեն Քրիստոսի խաչելութիւնը, որ փրկութեան իմաստ ունի: Եզրափակելով իր
խօսքը` սրբազանը կոչ ուղղեց բոլորին ուշադրութեամբ դիտելու Քրիստոսի խաչելութեան պատկերը,
խորհրդածելու եւ անոր մէջ տեսնելու փրկութիւնը: