Papa: të gjithë duhet të lutemi për priftërinjtë, që të jenë dëshmitarë të dashurisë
së Zotit
Në muajin qershor, Benedikti XVI u kërkon besimtarëve të luten që meshtarët të jenë
të bashkuar me Zemrën e Krishtit. “Të lutemi që meshtarët, të bashkuar me Zemrën e
Krishtit, të jenë gjithnjë dëshmitarë të vërtetë të dashurisë së kujdesshme e të mëshirshme
të Zotit”: ky është ndjeti i përgjithshëm i lutjes së Benediktit XVI për muajin qershor,
të cilin Kisha Katolike ia kushton Zemrës së Krishtit, pas majit, muajit kushtuar
Zojës së Bekuar. Rrënjosjes së meshtarisë në Zemrën e Krishtit, Papa i ka kushtuar
shumë reflektime, veçanërisht gjatë Vitit Meshtarak. Që në fillim të
papnisë së tij, Ati i Shenjtë u kërkon priftërinjve të jenë meshtarë “sipas Zemrës
së Krishtit”. Kjo thirrje merr kuptim të ri e shumëfishohet, kur Kisha plagoset rëndë
nga shkandulli i abuzimeve mbi të miturit të disa anëtarëve të klerit. Në përfundim
të Vitit Meshtarak, në festën e Zemrës së Krishtit, Papa kujton se meshtarët duhet
ta kenë vështrimin e ngulur në kraharorin e Krishtit, shporuar nga heshta e ushtarit
romak: “Po, zemra e Tij është e hapur për ne e para nesh – e me të, na u hap
zemra e vetë Zotit. Liturgjia e interpreton për ne gjuhën e zemrës së Jezusit, e cila
flet sidomos për Zotin si bari i njerëzve e, në këtë mënyrë, na tregon meshtarinë
e Jezusit, që rrënjoset në intimitetin e zemrës së Tij; kështu, na bën të qartë themelin
e përhershëm dhe kriterin e vlefshëm për çdo shërbim meshtarak, që gjithnjë, duhet
të ankorohet në zemrën e Jezusit dhe të jetohet duke u bazuar tek ajo” (Mesha
në përfundim të Vitit Meshtarak, 11 qershor 2010). Zemra e shporuar e Jezusit,
vazhdon Papa, bëhet burim: “Uji dhe gjaku, që dalin prej saj, na kujtojnë dy Sakramentet
themelore, me të cilat jeton Kisha: Pagëzimi dhe Eukaristia”. Pra, kjo zemër e hapur
është burim i lumit të ri të jetës: “Çdo i krishterë e çdo meshtar, duke filluar
nga Krishti, duhet të bëhet burim që u jep jetë të tjerëve. Ne duhet t’ia dhurojmë
ujin e jetës botës së etur. O Zot, të falenderojmë, sepse hape zemrën tënde për ne;
sepse me vdekjen dhe ringjalljen tënde u bëre burim jete” (Mesha në përfundim
të Vitit Meshtarak, 11 qershor 2010). “Cor ad Cor loquitur”, “Zemra i flet
zemrës”: motoja e të Lumit Njuman, që Papa e bëri të vetën gjatë udhëtimit apostolik
në Mbretërinë e Bashkuar, nënvizon rëndësinë që ka gjuha e zemrës për fenë. E kjo
vlen edhe më shumë për meshtarët. Jo rastësisht, pikërisht në Solemnitetin e Zemrës
së Krishtit, kremtohet dita për shenjtërimin e meshtarëve: “Meshtari është dhuratë
e Zemrës së Krishtit: një dhuratë për Kishën e për botën. Nga Zemra e Birit të Zotit,
përplot më dashuri e bamirësi, lindin të gjitha të mirat e Kishës. Veçanërisht, në
të e ka zanafillën thirrja e atyre njerëzve, që, të mahnitur nga Zoti ynë Jezu Krisht,
lenë gjithçka për t’iu kushtuar tërësisht shërbimit për popullin e krishterë, sipas
shembullit të Bariut të Mirë” (Lutja e Engjëllit të Tënzot, 13 qershor 2010). Gjatë
historisë, kujton Papa, shumë meshtarë kanë jetuar të bashkuar me Zemrën e Krishtit,
ia kanë kushtuar jetën Kishës, nganjëherë, deri në martirizim. Është rasti i të riut
don Jerzhi Popjelushko, viktimë e regjimit komunist në Poloni, por edhe të sa e sa
meshtarëve, që u martirizuan dhe u persekutuan në Shqipëri e në vendet e tjera të
Evropës Lindore: “Nëse shohim historinë, mund të vërejmë sa faqe rinovimi të
vërtetë shpirtëror e shoqëror janë shkruar me ndihmën vendimtare të meshtarëve katolikë,
të frymëzuar vetëm nga pasioni për Ungjillin e për njeriun, për lirinë e vërtetë të
tij, fetare e civile. Sa nisma për promovimin e plotë të njeriut e kanë zanafillën
në intuitën e një zemre meshtarake” (Lutja e Engjëllit të Tënzot, 13 qershor 2010). Benedikti
XVI u bën thirrje meshtarëve të jenë ajo që pritet prej tyre, t’ia dhurojnë vetveten
Krishtit e kështu, të bëhen vërtet shenjë e pranisë së Tij në mesin e popullit të
Zotit: “Dhurojani veten Jezusit për të hyrë në pafundësinë e Zemrës së Tij të
madhe, që përmban Zemrën e Nënës së tij të Shenjtë e atë të të gjithë shenjtorëve,
si edhe për të humbur në këto thellësi dashurie, bamirësie, mëshire, përvujtërie,
durimi, nënshtrimi e shenjtërie” (Audienca e përgjithshme, 19 gusht 2009).