Benedikti XVI në meshë me ish studentët: Jemi të thirrur t’ua çojmë njerëzve dritën
e fytyrës së Zotit
Neriu të mos e mbytë etjen për madhështi në sende kalimtare, por të zbulojë se Zoti
është uji i gjallë i vërtetë! Keshtu tha Papa dje paradite në qendrën Mariapoli të
Kastel Gandolfos,gjatë Meshës me ish-studentet e tij, ata që ulen në
bankat e një shkolle, e cila njihet me emrin Ratzinger Schülerkreis. Sivjet,
në qendër të seminarit tradicional veror të ish-nxënësve të Jozef Ratcingerit, mbajtur
në Kastelgandolfo ishte "ungjillëzimi i ri". Ati i Shenjtë, duke e hapur dje kremtimin
eukaristik, komentoi shkurtimisht fjalët e Psalmit 62, propozuar nga liturgjia e së
dielës: “Ka etje për ty shpirti im... ty të dëshiron trupi im, si toka e djerrë, e
thatë, pa ujë”. Është koha e pritjes së Zotit! Në këtë kohë, kur Zoti mungon –
tha Papa – kur toka e shpirtërave është e shkretë, e thatë, pa ujë, e njerëzit nuk
e dinë ende ku gurron uji i gjallë, t’i lutemi Zoti t’ua tregojë burimin! T’i
lutemi Zotit t’u tregojë atyre, të cilët e kërkojnë gjetiu ujin e gjallë, se është
Ai vetë uji i gjallë. T’i lutemi të mos lejojë, që jeta e njerëzve dhe etja e
tyre për madhështi, të mbytet, t’i zihet fryma në kotësinë e çastit kalimtar. Papa
i lartoi Zotit lutjen posaçërisht për të rinjtë, që shpirti i tyre të ketë gjithnjë
etje për Të. E më pas shtoi: “Edhe ne, që e njohim qysh në rininë e parë, duhet t’i
lypim ndjesë. Tepër pak ua çojmë njerëzve dritën e Fytyrës së Tij, sepse e ndjejmë
pak edhe në shpirtin tonë sigurinë se Zoti është, se Zoti është këtu pranë, se Zoti
është madhështia e vërtetë, për të cilën kemi etje gjithnjë, të gjithë. Etje, që vetëm
Ai mund ta shuajë”.Homelinë e Meshës e mbajti kryeipeshkvi i Vjenës, kardinali Kristof
Shënborn. Hirësia e Tij nënvizoi se të ecësh pas Krishtit, do të thotë ta mohosh krejtësisht
vetveten. Vetëm kështu mund të hysh në optikën e Zotit. Vetëm duke mos iu përshtatur
vullnetit të botës – vijoi Kardinali, në sa komentonte fjalët e Shën Palit drejtuar
Romakëve – mund ta njohim vullnetin e Zotit për jetën tonë e ta themelojmë këtë jetë
mbi Të. Këto janë kushtet, që duhen plotësuar pa tjetër, në se duam të jemi miq të
Zotit, pikë ku synojmë të arrijmë, kur përpiqemi të kthehemi në rrugën e Tij – tha
Kardinali Shënborn, në përfundim të homelisë.