Ungjillëzimi në kontinentin digjital. Imzot Celli flet mbi shtigjet e reja të komunikimit
Ungjillëzimi i ri kalon përmes kontinentit digjital që s’ka kufij, i cili tashmë banohet
nga mase dy miliardë njerëz. Kisha katolike prej kohësh ka ndërmarrë udhët e reja
digjitale për ti ofruar mundësinë e takimit kësaj pjese të konsiderueshme të njerëzimit
me Jezu Krishtin. Kështu pohoi mes tjerash kryeipeshkvi imzot Claudio Maria Celli,
president i Këshillit Papnor për Komunikimet shoqërore, në një intervistë dhënë të
përditshmes së Vatikanit ‘L’Osservatore Romano’ të 16 nëntorit duke folur mbi shtigjet
e reja të komunikimit, në kuadrin e punimeve të Kongresit të dytë ndërkombëtar të
Rrjetit informatik të Kishës në Amerikën Latine (Riial), që u zhvillua kohëve të fundit
në Santiago të Kilit, ku imzot Celli mori pjesë dhe mes tjerash propozoi idenë e një
teologjie të përtërirë të komunikimit. Në Kongres kushtuar Kishës dhe kulturës
digjitale, zhvilluar në kryeqytetin e Kilit, imzot Celli vuri theksin në mënyrë të
veçantë mbi rolin e komunikimit e atë të mediave në ungjillëzimin e ri, duke nënvizuar
marrëdhënien dhe lidhjen e ngushtë që ekziston ndërmjet misionit e komunikimit. Kisha,
sidomos duke u nisur nga Koncili II i Vatikanit, është përfshirë në ndryshime të thella
kulturore që ka shkaktuar pikërisht përshpejtimi i komunikimit. Papët – posaçërisht
Gjon Pali II e Benedikti XVI – kanë inkurajuar besimtarët të kenë rol aktiv e pozitiv
në fushën e komunikimit shoqëror, duke vënë Ungjillin në qendër të mesazhit për t’u
përhapur e për ta bërë atë të njohur në realitetin krejtësisht të ri të fshatit global.
Në këtë prizëm, Kisha është duke rilexuar aspektet e ndryshme të natyrës dhe të misionit
të vet që ka, duke propozuar në rend të parë, të vërtetën themelore të dinamikës komunikuese
të Zotit: e këtu mund të rizbulojmë atë mahnitje përherë të re se esenca e çdo akti
komunikues të Kishës nuk mund të mos i referohet vet natyrës së saj, asaj të një bashkësie
të themeluar nga Hyji i bërë njeri dhe nga Fjala e tij. E vet Mishërimi i Hyjit është
komunikim drejtuar e ofruar mbarë njerëzimit. Në Santo Domingo, më 1992, Ipeshkvijtë
e Amerikës Latine patën pohuar se Kisha komunikon-për-bashkim; që nga ai moment kjo
ka qenë edhe një pik referimi dhe udhërrëfyese e veprimtarisë në jetën e përditshme
të komuniteteve kishtare. Vërtet Kisha e ka në gjak komunikimin, sepse është pjesë
e pandashme natyrës së saj, prandaj ajo nuk mund ta injoroi asnjë fazë e asnjë synim
të komunikimit në tërësinë e vet, dhe e ndriçuar nga kultura digjitale e në dritën
e Ungjillit, ajo vepron në shoqëri si tharm. Synimi është pikërisht thellimi i njohjes
së Zotit nga pikëpamja e komunikimit. Ja me pak fjalë, arsyeja e Kongresit të Santiagos
së Kilit.