Չորեքշաբթի, 23 նոյեմբերին, իր մահկանացուն կնքեց հայազգի 84-ամեայ փրոֆ. Հրանդ Յակոբեան
ՀՀ սփիւռքի նախարար՝ Հրանուշ Յակոբեանի հայրը: Ողբացեալը եղած է Գաւառի պետական
համալսարանի խորհուրդի նախագահ, փիլիսոփայական գիտութիւններու դոկտոր եւ Հայաստանի գիտութեան
վաստակաւոր գործիչ։ Հոգեհանգստեան արարողութիւնը տեղի կ՝ունենայ 24 նոյեմբերին, Երեւանի
Ս. Յովհաննէս Մկրտիչ եկեղեցւոյ մէջ: Իսկ հրաժեշտի արարողութիւնը տեղի պիտի ունենայ
25 նոյեմբերին, Գաւառի պետական համալսարանին մէջ: Յուղարկաւորութիւնը (միշտ) տեղի պիտի
ունենայ Գաւառ քաղաքին մէջ: Հրանդ Յակոբեան ծնած է 17 դեկտեմբեր 1927-ին, Նոր Պայազետի
շրջանի Սարուխան գիւղին մէջ` արհեստաւորի ընտանիքին մէջ: 1990 թուականին Հրանդ Յակոբեան
կը պաշտպանէ դոկտորական ատենախօսութիւնը` ստանալով փիլիսոփայական գիտութիւններու դոկտորի
գիտական աստիճան: Ատենախօսութիւնը նուիրուած էր վիպասան Ռաֆֆիի պատմական-փիլիսոփայական
հայեացքներու վերլուծութեան եւ գիտական արժեւորման: 1991-ին Հրանդ Յակոբեանին շնորհուեցաւ
մասնագէտի կոչում: Հրանդ Յակոբեան, աշխուժ մասնակցութիւն կ՛ունենայ Երեւանի պետական համալսարանին
մէջ Աստուածաբանութեան բաժանմունքի բացման, ուր շուրջ տասնամեակ մը կը ղեկավարէ «Կրօնագիտութեան
ամպիոնը»: 2010-ին Հայաստանի նախագահին կողմէ արժանացած է գիտութեան վաստակաւոր գործիչի
կոչման: Ան պարգեւատրուած է նաեւ մեծ մարդասէր Ֆրիտիոֆ Նանսենի անուան ոսկիէ մետալով,
Երեւանի պետական համալսարանի ոսկիէ մետալով, բազմաթիւ այլ պարգեւներով, պատուոյ գիրերով
եւ յուշամետալներով: