Takohen në Vatikan, kardinali Levada dhe Eprori i Vëllazërisë së Shën Piut X
Pasditen e djeshme, Prefekti i Kongregatës për Doktrinën e Fesë, kardinali Uiliam
Levada u takua me Eprorin e Përgjithshëm të Vëllazërisë Meshtarake Shën Piu X, imzot
Bernard Felaj, në praninë e autoriteteve të tjera kishtare. Ndjekësit e kësaj Vëllazërie
njihen si “lëfevrianë”, nga emri i themeluesit të tyre. Objekti i takimit ishte paraqitja
e vlerësimeve të Selisë së Shenjtë për tekstin e dorëzuar nga Vëllazëria në muajin
prill, si përgjigje ndaj Preambulës doktrinale të Kongregatës për Doktrinën e Fesë,
ku shpreheshin kërkesat për rihabilitimin e lëfevrianëve dhe përfshirjen e tyre në
gjirin e Kishës Katolike. Imzot Felaj, pas sqarimeve, theksoi se Vëllazëria do t’u
përgjigjet sa më shpejt të jetë e mundur vërejtjeve të Vatikanit. U hartua edhe një
dokument, akoma i pamiratuar, me të cilin propozohet forma e Prelaturës Personale
si mjeti më i përshtatshëm për njohjen zyrtare të Vëllazërisë së Shën Piut X nga ana
e Selisë së Shenjtë.