Святы Пасад павіншаваў мусульман з заканчэннем Рамадана
На заканчэнне месяца
Рамадан, якое прыпадае на 18 жніўня, Папская рада па міжрэлігійным дыялогу скіравала
адмысловае пасланне да вызнаўцаў ісламу. Яно было апублікавана на 31 мове і прысвечана
неабходнасці выхавання хрысціянскай і мусульманскай моладзі да справядлівасці і міру,
“неадлучных ад праўды і свабоды”. “Гаворка ідзе аб прыгожым і адначасова складаным
заданні: дапамагчы дзецям і моладзі адкрыць і развіваць патэнцыял, які Стварыцель
даверыў ім, а таксама ўстанавіць адказныя міжчалавечыя адносіны”, - гаворыцца ў пасланні.
Адзначаецца, што Бэнэдыкт XVI неаднойчы казаў аб неабходнасці “сапраўдных сведкаў,
а не проста тых, хто навучае правілам і перадае інфармацыю... Сведкаў, якія самі жывуць
тым, што прапануюць”.
Паводле Папскай рады па міжрэлігійным дыялогу, для таго,
каб навучаць моладзь справядлівасці неабходна паказаць, што ўсе людзі былі створаны
Богам і пакліканы будаваць адзіную сям’ю, а супольнае дабро немагчыма без салідарнасці
і братэрскай любові. Гаворачы аб навучанні міру, ватыканская дыкастэрыя падкрэсліла,
што сёння гэта заданне стала асабліва тэрміновым. Неабходна сведчанне аб тым, што
“сапраўдная прырода міру не ў простай адсутнасці вайны і не ў раўнавазе паміж супрацьстаячымі
сіламі, але ў тым, што гэта дар Бога і чалавечая справа, якую трэба рабіць пастанна”.
“Мір – гэта плён справядлівасці і любові (...)Толькі мужчыны і жанчыны шчыра упэўненыя
ў гэтым могуць будаваць грамадства, дзе справядлівасць і мір стануць рэальнасцю”,
– адзначаецца ў пасланні Папскай рады да мусульман.