Në Vatikan, seminar për qelizat burimore të rritura dhe mjekësinë ripërtëritëse
Filloi më 11 prill e përfundon nesër, konferenca e dytë mbi temën “Mjekësia ripërtëritëse:
ndryshim themelor në shkencë e në kulturë”. Organizuar nga Këshilli Papnor i Kulturës,
konferenca diskuton për punën kërkimore në fushën e përdorimit të qelizave burimore
të rritura, duke vënë në dukje rezultatet e arritura. Të dëgjojmë imzot Tomash Trafnin,
i departamentit shkencor të Këshillit Papnor të Kulturës, në mikrofonin tonë: Pjesa
e parë iu kushtua përshëndetjeve, si të kardinalit Ravazi, kryetar i Këshillit Papnor
për Kulturën, ashtu edhe të kryetarit të Akademisë Papnore për Jetën, imzot Injacio
Karasko de Paula. Pastaj, u nënvizuan dy aspekte kryesore. Së pari, nevoja për të
hapur një dritare kërkimore ndërdisiplinore, ku shkencat natyrore të takohen me shkencat
humaniste për të shkëmbyer përvojën e njohuritë. E dyta: mjekësia ripërtëritëse dhe
tekonologjitë e protokollit të përdorimit të qelizave burimore të rritura kanë bërë
hapa të mëdha përpara. Kisha duhet të interesohet për këtë fushë delikate e të ndërlikuar
të punës kërkimore, sepse kemi të bëjmë me njerëz, që janë më pranë nesh në veprimtarinë
baritore, pasi janë ata që vuajnë, që janë të sëmurë, sidomos ata, që vuajnë nga sëmundje
të rënda degjenerative, të cilët kanë nevojë për ndihmën tonë.