Бразільскі кардынал: пяцідзесятнікі – выклік для Касцёла
Пяцідзясятніцкія супольнасці
абудзілі Каталіцкі Касцёл у Бразіліі, лічыць кардынал Раймунду Дамасэну Ассіс. “Магчыма,
мы адчулі сябе занадта камфортна, і, магчыма, рост пяцідзясятніцкіх рухаў нас абудзіць
і скалане да нашай рэальнай місіі”, - сказаў старшыня Канферэнцыі Біскупаў Бразіліі
ў інтэрв’ю нямецкай “KNA”. Кардынал падкрэсліў, што абранне папы Францішка выклікала
вялікую надзею і пазітыўныя чакання ў Каталіцкім Касцёле краіны. Гэта звязана, на
думку іерарха, з яго сціплымі і простымі паводзінамі, што робіць Пантыфіка блізкім
да людзей.
Па дадзеных перапісу 2010 г., 42 млн. (22%) са 190 млн. бразільцаў
лічаць сябе пратэстантамі або евангелістамі, у 2000 г. такіх было 26 млн. За той жа
перыяд колькасць католікаў знізілася са 125 млн. да 123 млн. – з 74% да 65% ад агульнай
колькасці насельніцтва.
Францішак паедзе ў Бразілію ў наступны панядзелак,
22 ліпеня. Гэта яго першая замежная паездка ў якасці Папы.
Аб выкліках, звязаных
з ростам колькасці пяцідзесятнікаў у свеце, у апошні час неаднойчы заяўляў і кардынал
Курт Кох, старшыня Папскай рады спрыяння хрысціянскаму адзінству. Сёння гэтыя супольнасці
займаюць другое пасля католікаў месца ў свеце па колькасці вернікаў. “Таму трэба казаць
аб вялікім уплыве, які яны маюць у хрысціянстве. Для экуменізму, гэта зусім новая
сітуацыя”, - адзначыў старшыня ватыканскай дыкастэрыі ў красавіку 2013 г. Іерарх лічыць,
што трэба ўважліва назіраць за развіццём пяцідзесятнікаў у тым ліку і Лацінскай Амерыцы,
каб весці разважанне аб спосабах экуменічнага дыялогу з імі. Трэба задумацца, чаму
вернікі пакідаюць Каталіцкі Касцёл і далучаюцца да гэтых груп. Адказу, на думку кардынала
Коха, варта шукаць у тэалагічным разважанні над роляй Святога Духа ў жыцці супольнасці.
Кардынал
Кох чакае ініцыятывы пашырэння экуменічнага дыялогу з пяцідзясятнікамі і з боку папы
Францішка, які дакладна ведае сітуацыю са сваёй працы ў Буэнас-Айрэсе, бо лацінаамерыканскія
евангелічныя рухі растуць сёння асабліва хутка. Развіццё пяцідзесятнікаў у свеце,
гэта вялікі выклік для Каталіцкага Касцёла, заявіў кардынал Кох у маі 2013 г.