Cikël reflektimesh kushtuar Katekizmit të Kishës Katolike: Transmetimi i Zbulesës-tradita
Reflektimi i 7-të i jezuitit atë Dariush Kovalçik, kushtuar Katekizmit të Ri të Kishës
Katolike, shtjellon një temë tejet të rëndësishme për fenë e besimtarit: lidhjen e
ngushtë ndërmjet Zbulesës e Traditës Kishtare.
Të krishterët besojnë se Hyji,
i zbuluar në Vetjen e Jezu Krishtit, “dëshiron që të gjithë njerëzit të shëlbohen
e të arrijnë në njohjen e së vërtetës” (1Tm 2,4). Është e nevojshme, prandaj,
që mesazhi i Jezusit t’u përcillet të gjitha breznive, në të gjitha kohët.
Katekizmi
kujton se shpallja e Ungjillit u realizua në dy mënyra: me gojë e me shkrim; përmes
predikimit të Apostujve e shkrimeve të frymëzuara nga Shpirti Shenjt, që formojnë
Biblën. Duhet kujtuar se predikimi i parapriu Shkrimit Shenjt, megjithëse gjeti në
të shprehjen e përkryer, “normën më të lartë të fesë”.
Predikimin apostolik
e vijuan, në rrjedhë shekujsh, ipeshkvijtë dhe bashkëpunëtorët e tyre. Në numrin 78
të Katekizmit lexojmë se “ky transmetim i gjallë…u quajt Traditë, sepse dallohet nga
Shkrimi Shenjt, ndonëse lidhet ngushtë me të”. Përmes Traditës Kishtare Hyji vijon
të flasë me Nusen e Birit të vet, domethënë, me Kishën, ndërsa Shpirti Shenjt u prin
besimtarëve drejt së vërtetës në tërësinë e saj.
Nga Tradita Kishtare, që vjen
prej Apostujve e transmeton çka morën nga Krishti, dallohen “traditat” devocionale
ose disiplinore, lindur në rrjedhë kohe në Kishat vendase. Përmes kësaj tradite, që
po e quajmë ‘e vogël’, shprehet Tradita e madhe, në përshtatje me kulturat dhe epokat
e ndryshme. Traditat – lexojmë në Katekizëm – “mund të ruhen, të modifikohen ose të
braktisen, nën udhëheqjen e Magjisterit të Kishës”(KKK 83). T’i ruajmë,
prandaj, traditat e devocionet e ndryshme fetare, përderisa të na ndihmojnë në fenë
tonë, por duke u kujdesur që të mos e zbehin kurrë Traditën Kishtare Apostolike.