Арцыбіскуп Паралін пра фундаменты і мэты дыпламатыі
Дыпламатыя павінна
быць чалавечай – гэта значыць павінна мець у цэнтры сваёй увагі чалавечую асобу, лічыць
арцыбіскуп Пьетра Паралін, Дзяржсакратар Яго Святасці Папы. Аб сваім бачанні дыпламатыі
іерарх расказаў у інтэрв’ю Ватыканскаму тэлевізійнаму цэнтру пасля сустрэчы Святога
Айца з дыпламатычным корпусам акрэдытаваным пры Апостальскай Сталіцы, якая адбылася
13 студзеня 2014 г. Ён адзначыў, што таксама і ў дыпламатыі папа Францішак падштурхоўвае
ўсведамляць важнасць канкрэтнай, а не “абстрактнай” чалавечай асобы. “Кожны чалавек
павінен быць у цэнтры нашай дзейнасці, асабліва бедныя, маргіналізаваныя, слабыя,
найбольш уразлівыя, людзі якія не маюць голаса”, - сказаў арцыбіскуп Паралін.
На
яго думку, дыпламатыя таксама павінна быць скіравана на сустрэчу. “Шмат разоў Папа
падкрэсліваў важнасць культуры сустрэчы, выхаду з ізаляцыі (...), бо толькі так можна
зразумець адно аднаго, прымаць і супрацоўнічаць”, - сказаў іерарх.
Яшчэ адным
важным аспектам дыпламатычнай дзейнасці арцыбіскуп Паралін лічыць “салідарнасць і
прыняцце да сэрца сітуацый іншых”, насуперак пануючай “культуры абыякавасці”. “Прынцыпам
чалавечай дыпламатыі з’яўляецца любоў, увага да асобы, любоў да кожнага чалавека”,
- сказаў іерарх.
Гаворачы пра ватыканскую дыпламатыю арцыбіскуп Паралін адзначыў,
што перад абліччам шматлікіх падзелаў і канфліктаў, якія перажывае свет, яна, як ніколі
раней, паклікана спрыяць сустрэчы, павазе і дыялогу паміж народамі і ўмацоўваць іх.
На яго думку, ватыканская дыпламатыя павінна дапамагаць, каб адметнасці якія існуюць
паміж народамі і культурамі, у свеце, які хутка збліжаецца, не станавіліся прычынамі
супрацьстаяння і барацьбы, а наадварот – узаемнага ўзбагачэння. “Гэта задача дыпламатыі
увогуле і папскай дыпламатыі ў прыватнасці”, - сказаў ён.