Кардынал Шонборн пра “рэалістычнасць” поглядаў папы Францішка
Кардынал Крыстаф Шонборн
назваў сустрэчу з папам Францішкам “у лепшым сэнсе гэтага слова брацкай”. Аўстрыйскія
іерархі знаходзіліся на мінулым тыдні ў Рыме з візітам “ad limina Apostolorum”. Арцыбіскуп
Венскі нагадаў, што Пантыфік заклікаў іх “ісці наперад” у пашырэнні чалавечай годнасці
і фарміраванні грамадскай свядомасці ў пытаннях беднасці, барацьбы за мір, супрацьстаяння
гандлю людзьмі. Асабліва станоўча Папа адрэагаваў на ініцыятыву аўстрыйскіх жаночых
манаскіх супольнасцяў “узяць на сябе працу па вырашэнні вялікай і драматычнай праблемы
гандлю людзьмі”, сказаў аўстрыйскі кардынал у інтэрв’ю выданню “Kurier”. Францішак
назваў гэта “адной з самых непакоячых тэм нашага часу”, калі на вачах усіх адбываецца
гандаль рабамі.
Арцыбіскуп Венскі быў уражаны “рэалістычнасцю” поглядаў папы
Францішка адносна сітуацыі сужэнства і сям’і. Святы Айцец адносіцца з поўнай сімпатыяй
і спагадай да людзей, якія апынуліся ў цяжкай сямейнай сітуацыі. Кардынал запярэчыў
таму, што Пантыфік “збіраецца змяніць вучэння Касцёла” на тэму сужэнства і сям’і,
паколькі яно заснована на словах Езуса. Але размова ідзе пра тое, як лепш адказаць
на выклік усё большай колькасці разведзеных і знайсці сябе ў сітуацыі, калі “партнёрства
сёння выяўляецца ў розных формах”, сказаў арцыбіскуп Венскі. Тут “рэалістычнасць”
папы Францішка, на яго думку, будзе адыгрываць значную ролю.
Пантыфік не будзе
“апярэджваць” Сіноду Біскупаў па пытаннях сям’і, тым больш, што гэта ішло б “насуперак
яго самаразумення”; ён не прымае “у адзіночку камерных рашэнняў, якія папярэдне не
абмяркоўваліся сумесна”. У любым выпадку, Папа хоча пачуць меркаванні, якія зыходзяць
з усіх узроўняў Касцёла, каб ведаць сапраўдную сітуацыю. І гэта, паводле кардынала
Шонборна, вельмі абнадзейвае.