«ՌԻԱ Նովոսթի» կը հաղորդէ, որ երէկ Մոսկուայի թիւ 263 դպրոց ներխուժած է բարձր դասարանէն
աշակերտ մը, որ զինուած էր, եւ պատանդ բռնած 10-րդ դասարանի աշակերտներն ու կենսաբանութեան
ուսուցիչը: Լրատու գործակալութիւնը` վկայակոչելով ներքին գործոց նախարարութեան տուեալները,
կը հաղորդէ, որ սպաննուած են ուսուցիչ մը եւ ոստիկան մը. այլ ոստիկան մը վիրաւորուած
է: Պատանդ բռնուած բոլոր աշակերտներն ալ ազատ արձակուած են: Ըստ «Լայֆնիուզ»-ի, պատանդ
բռնուած աշակերտներու շարքին եղած է հայ մը` Ռոման Ալեքսանեան: Աւելի ուշ ի յայտ եկած
է, որ յանցագործը նոյն դպրոցի գերազանց աշակերտ Սերկէյ Կորտիեւն է: Ըստ կարգ մը տեղեկութեանց,
յարձակումին թիրախը եղած է աշխարհագրութեան 37-ամեայ ուսուցիչը, որ սպաննուած է: Դէպքը
աւարտած է զինեալին ձերբակալութեամբ: