Simpozium në Vatikan. Imzot Sorondo: të sensibilizohet opinioni publik për ndryshimet
e klimës
Të sensibilizohet politika dhe opinioni publik për mundësinë e zhvillimit, pa shkaktuar
dëme në ambient. Me këtë synim, u mbajt në Vatikan, një kuvend i organizuar nga Akademia
Papnore e Shkencave. Shkencëtarët e ardhur nga universitete të njohura ndërkombëtare
nënvizuan rreziqet, që i vijnë botës nga ngrohja e vazhdueshme e Tokës. Kancelari
i Akademisë, imzot Marcelo Sànchez Sorondo mbylli dje punimet. Ja ç’tha në intervistën
për Radio Vatikanin: Ekziston një
ndryshim i klimës, që varet nga veprimtaria e njeriut. Shumëkush nuk do ta pranojë
këtë. Akademia e Shkencave i ka studiuar këto probleme, me një ekip shumë prestigjioz,
ku bëjnë pjesë tre Çmime Nobel: Crutzen, Molina dhe Ramanathan. Me qëndrimin e tyre
u bashkuan dalëngadalë edhe fizikanët, biologët e së fundi, ekonomistët. Prandaj,
mund të themi se, tashmë, është opinion i përbashkët. Problemi më serioz: nga pasojat
e ndryshimit të klimës, si ngrohja e Tokës, vuajnë 3 miliard njerëz, praktikisht,
gjysma e njerëzimit, që nuk zotëron naftë e nuk i gëzon përfitimet, që vijnë nga nafta. Flitet
për një Enciklikë të mundshme të Papës Françesku për mbrojtjen e Gjithësisë, së krijuar
prej Zotit… Unë dëgjova dialogun e Papës me dy organizatorët. Njëri i tha se
problemi është serioz dhe se pasojat i vuajnë më të varfërit e botës. Tjetri i tha
se sot nuk mund të kemi zgjidhje të këtij problemi, nëse nuk bashkohen shkencat humane
me shkencat natyrore. Natyrisht, Papa ishte i vetëdijshëm për këtë dhe i tha se do
të lutej. Akoma nuk ka asgjë zyrtare [për Enciklikën]. Ndoshta do ta shkruajë, meqë
ajo e Krijesave të Zotit, e Gjithësisë, është temë themelore.