Կրօններու պատմութիւնն ուսումնասիրելու
միջոցին, տեղեկացան որ ժողովուրդներէն ոմանք մեծարած են միայն մէկ Աստուած, իսկ ուրիշներ
բազմաթիւ չաստուածներ պաշտած են: Արդեօք այս երկու պաշտամունքի ձեւերէն ո՞ր մէկը աւելի
կանուխ սկիզբ առած է, միաստուածութիւ՞նը թէ բազմաստուածութիւնը: Այս հարցին մասին
գիտնականներուն պատասխանները կը տարբերին: Ըստ ոմանց (Վ. Վունտ)` մարդս բնութեան զանազան
ուժերուն (արեւին, լուսնին, կրակին, եւն.) մէջ աստուածներ տեսնելով` նախ բազմաստուածու-թեան
հետեւած է: Յետագային, բնութեան այս ուժերուն աստուածացումին աւելցուցած է հերոսներուն
եւ դիւցազներուն աստուածացումը: Ըստ Եւմե-րոս Մեսենացիին (Ք. Ա. 4.դարուն վերջերը) աստուածները
նախ մարդիկ եղած են, որոնց բացառիկ քաջութեան կամ իմաստութեան համար` ժողվուրդին երեւակայութիւնը
զանոնք բարձրացուցած է աստուածներուն կարգին: Սակայն ըստ այլ ընկերաբաններու, (Ա.
Լէնկ), մարդը իր պաշտամունքին մէջ միաստուածութեամբ սկսաւ, որ կրօնի մը զարգացման առաջին
հանգրուանն եղաւ: Յետագային է որ, մարդը հետզհետէ անցաւ բազմաստուածութեան: Լէնկ իր
այս եզրակացութեան յանգելու համար` հիմնուեցաւ քաղաքակր-թութեան ամէն շփումէն հեռու մնացած
ասիական, ափրիկեան եւ ամերիկեան ցեղախումբերուն մօտ կատարած իր հետազօտութիւններուն վրայ:
Ան այս բոլոր ժողովուրդներուն մօտ գտաւ մէկ ու գերագոյն աստուծոյ մը գոյութեան համոզումը:
Ըստ այս տեսութեան, նախամարդը բնութեան բոլոր ուժերը մէկ գերագոյն ուժի ենթարկած
է: Այս գերագոյն ուժը ոգի մը չէ, այլ անձնաւորեալ էակ մը, որ մարդուն մնան մարմին ունի:
Ան յաւիտենական է, ամենազօր, տէր կեանքի եւ բարոյականի: Ցաւին ու չարին գոյութիւնը
եւս մարդը պիտի մղէ բազմաստուածութեան երբ ան պիտի հաւատայ թէ չար եւ բարի տարբեր աստուածներ
կան: Մարդը իր յաջողութիւնները, ինչպէս` բեղմնաւորումը կամ տարած յաղթա-նակները պիտի
վերագրէ բարի աստուածներուն, իսկ ձախողութիւնը, մահը`չար աստուածներուն: