Կրնա՞յ Քրիստոնեայ մը ուրախ ըլլալ երբ իր եղբայրները տրտում վիճակի մէջ են:
Քրիստոնեայի ուրախութիւնը
կախեալ է իր ունեցած կապակցութենէն Աստուծոյ հետ: Որքան այդ կապը զօրաւոր է, այդքան ուրախութիւնը
կ'աւելնայ քրիստոնեային սրտին մէջ: Իր հռոմէացիներուն գրած նամակին մէջ (Հռոմ 12,
15), Սուրբ Պռղոս կը հրաւիրէ Քրիստոսի հետեւողները ուրախանալու ուրախներուն հետ, եւ տրտմելու
տխրողներուն հետ: Ուրիշ խօսքով, քրիստոնեան պարտի մասնակից ըլլալ իր եղբայրներուն թէ
ուրախութեան եւ թէ տրտմութեան: Ամէնօրեայ գործնական կեանքին մէջ, մեր արտայայտած արտաքին
ուրախութիւնը կրնայ ժխտական կերպով մեկնաբանուիլ տխուր անձի մը կողմէն եւ նոյնիսկ մեր
տարած նուաճումները զիրենք ուրախացնելու տեղ մէջէրնին կը ստեղծեն նախանձ եւ յուսահատութիւն: Ինչպէ՞ս
պէտք է վարուիլ ուրեմն երբ դիմացը կը գտնենք եղբայր մը որ ժխտական եւ յոռետես կերպով
կը դատէ իր շուրջինները որոհետեւ կը գտնուի տրտում կամ յուսալքուած վիճակի մը մէջ: Փիլիպպեցիներուն
նամակին մէջ (4, 5), Սուրբ Պօղոս կը բացատրէ իմաստը այս քրիստոնէական ուրախութեան: Այս
ուրախութիւը արտաքին արտայայտութիւն մը չէ ըստ Սուրբ Պօղոսին, այլ կը ցոլացնէ մեր սրտին
բարութիւնը իբր հետեւանք մեր բարեկամութեան Աստուծոյ հետ: Այս ուրախութիւնը կրնանք փոխանձել
անոր որ պէտք ունի, մեր վարուելակերպով եւ կեցուածքով, որոնք դրական արդիւնք կրնան ունենալ
անձի մը համար որ կ'ապրի տխուր կամ յուսախաբ վիճակի մը մէջ: Ձմեռուայ պաղ եղանակին
ընթացքին ամէն անձ կը փնտռէ վառարանին տուած տաքութիւնը: Նմանապէս մենք եւս ուրիշին հանդէպ
վարուելով եղբայրասիրութեամբ եւ բարութեամբ, կը յաջողինք անոր սիրտը լեցնել յոյսով ես
սիրով եւ փառատել տխրութեան եւ յուսահատութեան գաղափարները: Այս մեր կեցուածքը պտուղն
է Սուրբ Հոգւոյն ներդումին մեր սրտին մէջ որ մեր սիրտը լեցնելով Աստուածային շնորհքով
եւ ուրախութեամբ մեզ կը հրաւիրէ զայն բաժանելու մեր եղբայրներուն հետ որոնք զրկուած են
անոնցմէ: Մէկ խօսքով, մեր դրական կեցուածքը պիտի պարգեւէ այդ ուրախութիւնը եւ սրտի հանդարտութիւնը
որ արդիւնքն են Աստուծոյ ներկայութեան մեր մէջ: Շնորհիւ այս կապին, պիտի կարենանք անոնց
փոխանցել մեր ներքին ուրախութիւնը, ինչպէս նաեւ ուժ եւ քաջութիւն որոնք պիտի օգնեն իրենց
այս ժխտական վիճակէն դուրս ելլել՝ ճանչնալու համար գաղտնիքը քրիստոնէական ճշմարիտ ուրախութեան: Հայր
Գէորգ Ծ. Վրդ. Ասատուրեան